Tia Ganga ku se Tres Kabritinhu
Éra un bes tenba un kabra ki txumaba Tia Ganga. El tenba tres kabritinhu. Tia Ganga ta saiba tudu dia p’el baba kumê padja. El ta fraba se minis pa ka abri Nho Lobu pórta p’el ka kume-s. Un dia, Nho Lobu bá konkô riju na pórta di Tia Ganga. Kes kabritinhu ka abri-l pórta pamódi dj’es sabeba m’éra Nho Lobu. Nho Lobu fika tristi y ku fómi. El bá kaza di Tubinhu. El fra-l, “É bo, Tubinhu, N bá kaza di Tia Ganga pa N odjâ si N ta nganaba kes kabritinhu, ma es ka abri-m pórta. Fra-m kumó ke pa N fazê pa-m ngana-s? Tubinhu pensâ dóra y el responde-l. “Titiu, Nho ten ki fazê vós sima di ses mai.” Nho Lobu frâ, “É simé, bu ten razan.” Nho Lobu bá se kaza. El fika ta pratikâ se vós. Pratikâ di li, pratikâ di la, Nho Lobu kansâ. El fika ku soru ta pingâ. Otu dia, Nho Lobu tornâ bá kaza di Tia Ganga. El konkô na pórta, ma minis ka abri-l pórta. Se vós inda ka staba sima di ses mai. Nho Lobu tornâ bá kaza di Tubinhu. Tubinhu frâ m’el mestaba pratikâ kel vós mas inda. Tanbe, el da-l un txifri p’el pô riba kabésa. Nho Lobu tuma kel txifri y el pidi Tubinhu un kórda p’el marrâ-l na se kabésa. Na ben k’el ta ben pa kaza, el ba biziâ Tia Ganga. Dipos el ba se kaminhu. Anti kabâ manxê, el pô pé na kaminhu pa kaza di Tia Ganga. El bá odjâ s’el ta nganaba kes kabritinhu. Kantu kel txigâ la, el konkô na pórta. Kes kabritinhu perguntâ, “ É kenhê ?” Nho Lobu papiâ ku lingua lébi na bóka. El frâ, “Nhos abri-m pórta pa N dâ- nhos mamâ.” Kes kabritinhu frâ, “Mostra-nu txifri.” Nho Lobu metê se txifri baxu pórta p’es odjâ. Es abri pórta. Kantu k’es odjâ m’éra Nho Lobu, es fika ta gritâ. Es bá ngatxa. Nho Lobu djobê-s te k’el atxa-s. El kabâ atxa-s, el nguli-s d’un sentada. El panhâ txabi di Tia Ganga, el fitxâ pórta y el bá kaza preparâ p’el bá fésta noti na kaza di Tubinhu. Tia Ganga ben txigâ. El konkô na pórta, mas ningen ka abri pórta. El pintxâ pórta, el entrâ. El spiâ pa tudu kabu p’el odjâ s’el ta odjaba se kabritinhu. Nada el ka atxâ. El konpô, el marrâ séti lénsu na kabésa, el dâ kaminhu pa fêsta. Dj’el sabeba m’el ta atxaba Nho Lobu la. Nho Lobu bá fésta tudu kontenti. El fika ta tokâ tanboru, ta kantâ y ta badjâ. El da un vórta, el botâ kel txabi dentu sinza. El kantâ, “É mi k’é Nho Lobu ki kumê kes tres kabritinhu, tu, tu, tu,tu. É mi k’é Nho Lobu ki kumê kes tres kabritinhu, tu, tu, tu, tu.” Briu da-l, el bá preguntâ Tia Ganga p’es bá badjâ. El frâ Tia Ganga pa tra se lénsu ma el ta trâ se txapéu. Kumó Tia Ganga teneba séti lénsu, el ka negâ. El kumesâ ta badjâ ku Nho Lobu. Kada vólta kel dâ, el fika ta trâ un lénsu. Kantu ki dj’el trâ kuatu lénsu, korru kumesâ ta parsê. Nho Lobu frâ, “Nhos djobe-m kel txabi pamódi ê di Tia Ganga.” Ningen ka kudi. Kantu ki Tia Ganga ta kabâ trâ kel últimu lénsu, Nho Lobu korrê el dâ baxu ménza. Tia Ganga fra-l, “É bo própi ki N staba ta djobê. Undi ki dja bu lebâ nhas kabritinhu?” Nho Lobu fika ta tremê di medu. Tia Ganga da-l ku korru na barriga, se tres kabritinhu sai bibu. Nho Lobu morrê. Inda onti N pasa la, N odjâ Tubin
English
hi5 Coins
MyHotComments